Zara Gham-Zadon Ke Bhi Gham-Khwar Rahna

zara gham-zadon ke bhi gham-khvar rahna

karen naaz to naz-bardar rahna

farakhi-o-usrat men shadi-o-gham men

bahar-hal yaron ke tum yaar rahna

samajh nardban apni nakamiyon ko

ki hai shart-e-himmat talabgar rahna

karo shukr hai ye inayat khuda ki

balaon men aksar giraftar rahna

agar aadmi ko na ho mashghala kuchh

bahisht-e-barin men ho dushvar rahna

khabar bhi hai aadam se jannat chhutti kyuun

khilaf-e-jibillat tha be-kar rahna

samajhte hain sheron ko bhi narm chara

ghazalan-e-shahri se hoshyar rahna

Leave a Comment