daryaft kar ke ḳhud ko zamane se duur huun
har shaḳhs ba-shu.ur hai main be-shu.ur huun
hijrat mira nasib hai parvaz mashghala
gumbad ke da.ere men misal-e-tuyur huun
gandum ki ḳhushbu raqs men rakhti hai rat-din
masti-bhari sharab ke nashshe men chuur huun
sadiyon se be-libas darida-badan udaas
tasvir-e-ka.enat men be-rang-o-nur huun
bosida si kitab ka ik hashiya ho tum
lauh-e-azal pe likkha main bainassutur huun
mera vajud paani hua miTTi aur aag
bikhri hui ana huun sulagta ghurur huun
fard-e-amal navishta-e-taqdir paḌh chuka
ḳhamosh sar jhuka.e ḳhud apne huzur huun
khincha nahin hisar koi apne ird-gird
‘ishrat’ main apni zaat men tanha zarur huun
Leave a Reply