Kishwar Naheed
vidaa karta hai dil satvat-e-rag-e-jan ko
khabar karo mire khvabon ke shab-sulaiman ko
muhit-e-jan na koi zaiqa na sabza-e-shab
talash karti hai khushbu kisi gareban ko
mujhe ye fasl-e-khizan-khvab kaat lene do
ki phir na nikle koi dusra bayaban ko
lahu ko aankh men rahne ka zom tha varna
tapak bhi sakta tha bahla ke dil ke tufan ko
mujhe to gham bhi panah zaad hi lage ab to
ki aa nikalti hai hasrat bhi sair-e-mizhgan ko
kisi udu ki muravvat se ab bhi taaza hain
vo zakhm-e-khvab ki jo dhundte hain paikan ko
hisab us ki mohabbat ka harf harf karun
jo aa gaya tha miri tishnagi ke saman ko
Leave a Reply