raat aḳhir ho sitam-peshon pe aisa bhi nahin
vaqt ruk jaa.e kahin aa ke ye hota bhi nahin
apne hone ki saza kis ko mila karti hai
kis ko ye zaḳhm dikha.un jo huvaida bhi nahin
muntazir a.ina-ḳhane hain na jaane kis ke
shahr-e-timsal men ab to koi chehra bhi nahin
tujh se mansub the sab jaur sahe ham ne magar
pas-e-namus-e-mohabbat tha pukara bhi nahin
koi hasil nahin is kar-e-junun ka ‘rashid’
khelta aag se huun aur tamasha bhi nahin
Leave a Reply