imam-bakhsh-nasikh

Dil Mein Poshida Tap-E-Ishq-E-Butan Rakhte Hain

dil men poshida tap-e-ishq-e-butan rakhte hain

aag ham sang ki manind nihan rakhte hain

tazgi hai sukhan-e-kuhna men ye bad-e-vafat

log aksar mire jiine ka guman rakhte hain

bha gai kaun si vo baat buton ki varna

na kamar rakhte hain kafir na dahan rakhte hain

misl-e-parvana nahin kuchh zar-o-mal apne paas

ham faqat tum pe fida karne ko jaan rakhte hain

mahfil-e-yar men kuchh baat na nikli munh se

kahne ko shama ki manind zaban rakhte hain

ho gaya zard padi jis ki hasinon pe nazar

ye ajab gul hain ki tasir-e-khizan rakhte hain

evaz-e-mulk-e-jahan mulk-e-sukhan hai ‘nasikh’

go nahin hukm-e-ravan taba-e-ravan rakhte hain

More Poems

Leave a Comment