kabhi bahar nahin aati sada parde men rahti hai
ḳhuda jaane tamanna kis ke bahkave men rahti hai
tumhara saath meri zindagi bhar ki kama.i thi
ga.e ho jab se tum ye zindagi ghaTe men rahti hai
jise ham log mil kar ashram men chhoḌ aa.e the
vo charḳha kat.ti hai chand ke chehre men rahti hai
use ham par to dete hain magar uḌne nahin dete
hamari beTi bulbul hai magar pinjre men rahti hai
kaman se tiir chhuTe to kabhi vapas nahin aata
magar us ko ghalat-fahmi mere baare men rahti hai
vo jab tak lauT kar schōl se ghar aa nahin jaata
hamari jaan aTki har ghaḌi beTe men rahti hai
Thaharne hi nahin deti hain ghar men shahr ki ḳhabren
zara bahar nikalte hain to jaan ḳhatre men rahti hai
Leave a Reply