Mahesh Chandra Naqsh
talḳhi-e-halat-e-dauran ka bayan hai zindagi
dard-o-gham ki ik musalsal dastan hai zindagi
allah allah ye safar ye raah ye dushvariyan
vaqt ke shanon pe ik bar-e-giran hai zindagi
jin ki halchal men hai tufani havaon ka ḳharosh
un taḌapti arzuon ka jahan hai zindagi
shiddat-e-ehsas-e-nakami ki atish-gah se
ḳhirman-e-jazbat par shola-fishan hai zindagi
hai kise ab zindagi ke dard-e-pinhan ki ḳhabar
apni barbadi ki ḳhud hi raz-dan hai zindagi
ye umidon ka chaman hai rashk-e-sad husn-e-chaman
is chaman ki ik bahar-e-javedan hai zindagi
hai usi ke nuur se tabani-e-kaun-o-makan
zulmat-e-bazm-e-jahan men zau-fishan hai zindagi
us ki marzi par hai har qaid o riha.i munhasir
ḳhud qafas hai aur ḳhud hi ashiyan hai zindagi
‘naqsh’ dard-e-qaum hai qalb o jigar men shola-zan
jazba-e-ahl-e-vatan ki tarjuman hai zindagi
Leave a Reply