zamane ka bharosa kya abhi kuchh hai abhi kuchh hai
yahi hai rang duniya ka abhi kuchh hai abhi kuchh hai
javani ki hai aamad husn ki har-dam taraqqi hai
tiri surat tira naqsha abhi kuchh hai abhi kuchh hai
na aa.ega qarar us ko na mumkin hai qayam us ko
hamara dil tira va.ada abhi kuchh hai abhi kuchh hai
kabhi to justuju us ki kabhi gum aap ho jaana
miri vahshat mira sauda abhi kuchh hai abhi kuchh hai
ghurur-e-husn hai sar men ḳhayal-e-dilbari dil men
dimagh un ka mizaj un ka abhi kuchh hai abhi kuchh hai
zara main mehrban hona zara main jaan ke dushman
ajab dil hai hasinon ka abhi kuchh hai abhi kuchh hai
tumhen kyuun is qadar gham hai ‘hafiz’ apni tabahi ka
yahi duniya ka hai naqsha abhi kuchh hai abhi kuchh hai
Leave a Reply