Kaif Bhopali
jism par baaqi ye sar hai kya karun
dast-e-qatil be-hunar hai kya karun
chahta huun phunk duun is shahr ko
shahr men in ka bhi ghar hai kya karun
vo to sau sau martaba chahen mujhe
meri chahat men kasar hai kya karun
paanv men zanjir kanTe aable
aur phir hukm-e-safar hai kya karun
‘kaif’ ka dil ‘kaif’ ka dil hai magar
vo nazar phir vo nazar hai kya karun
‘kaif’ men huun ek nurani kitab
paḌhne vaala kam-nazar hai kya karun
Leave a Reply