ankhon se duur subh ke taare chale gae
niind aa gai to gham ke nazare chale gae
dil tha kisi ki yaad men masruf aur ham
shishe men zindagi ko utare chale gae
allah re be-khudi ki ham un ke hi ru-ba-ru
be-ikhtiyar unhi ko pukare chale gae
mushkil tha kuchh to aish ki baazi ka jitna
kuchh jitne ke khauf se haare chale gae
nakami-e-hayat ka karte bhi kya gila
do din guzarna the guzare chale gae
targhib-e-tark-e-shauq ke parde men gham-gusar
har naqsh-e-arzu ko ubhare chale gae
pahunchai kis ne davat-e-mai ahl-e-zohd ko
shayad tiri nazar ke ishare chale gae
vo dil harif-e-jalva-e-firdaus ban gaya
jis dil men tere gham ke sharare chale gae
un ke baghair ziist ba-har-hal ziist thi
jaisi guzarni thi guzare chale gae
jalve kahan jo zauq-e-tamasha nahin ‘shakil’
nazren chali gaiin to nazare chale gae
Leave a Reply