kisi ki yaad ko ham ziist ka hasil samajhte hain
usi ko rahat-e-jan aur sukun-e-dil samajhte hain
sahara hai kahan yarab tire kashti-shikaston ka
nikal aati hai mauj aḳhir jise sahil samajhte hain
dil-e-gham-dida rota hai tiri sahra-navardi par
magar ai qais ham laila ko bhi mahmil samajhte hain
ye hai daur-e-haqa.eq sehr-o-afsun ho ga.e batil
magar kam hain jo sehr-e-husn ko batil samajhte hain
kahan zarra kahan ḳhurshid ḳhush-fahmi hai ye apni
ki ḳhud ko jalva-gah-e-dost ke qabil samajhte hain
adam hai ik nafas ka fasla hasti se lekin ham
vo ghafil hain ki us ko duur ki manzil samajhte hain
kabhi ‘mahrum’ ham bhi zindagi par jaan dete the
magar ab maut se us ko siva mushkil samajhte hain
Leave a Reply