Aleem Usmani
tire chand jaise ruḳh par ye nishan-e-dard kyuun hain
tire surḳh arizon ke ye gulab zard kyuun hain
tujhe kya hua hai aḳhir mujhe kam se kam bata to
tiri saans tez kyuun hai tire haath sard kyuun hain
tujhe na-pasand jo the vahi be-viqar rahte
jo aziiz the tujhe vo tire dar ki gard kyuun hain
vo kitab laao jis men hai bayan shan-e-qaumi
mire daur ki ye qaumen ba-giraft-e-fard kyuun hain
mujhe shak guzar raha hai tiri chara-saziyon par
ai masih-e-vaqt batla ye dilon men dard kyuun hain
jinhen yaad the fasane bahut apne bazuon ke
ai ‘alim’ muzmahil se vo dam-e-nabard kyuun hain
Leave a Reply