Etibar Sajid
zakhmon ka do-shala pahna dhuup ko sar par taan liya
kya kya ham ne khasht kamae kahan kahan nirvan liya
naqsh diye tiri ashaon ko aks diye tire sapnon ko
lekin dekh hamari halat vaqt ne kya tavan liya
ashkon men ham gundh chuke the us ke lams ki khushbu ko
mom ke phuul banane baithe lekin dhuup ne aan liya
barson baad hamen dekha to pahron us ne baat na ki
kuchh to gard-e-safar se bhanpa kuchh ankhon se jaan liya
aankh pe haat dhare phirte the lekin shahr ke logon ne
us ki baten chhed ke ham ko lahje se pahchan liya
suraj suraj khel rahe the ‘sajid’ ham kal us ke saath
ik ik qaus-e-quzah se guzre ik ik badal chhan liya
Leave a Reply