Agarche Sab Yahan Sasta paDega

agarche sab yahāñ sastā paḌegā

tumheñ bas ishq hī mahñgā paḌegā

musavvir se ulajhne kī sazā hai

hameñ tasvīr meñ rahnā paḌegā

mirī āñkhoñ meñ tum bach kar utarnā

yahāñ ashkoñ kā ik dariyā paḌegā

sabhī kirdār gar rakhne haiñ zinda

kahānī meñ hameñ marnā paḌegā

tumheñ bhī achchhe ham lagne lage haiñ

suno tum ko bhī pachhtānā paḌegā

ghaḌī sach bolne kī aa ga.ī hai

hameñ dānista haklānā paḌegā

charas se bachne ko tum kah rahe ho

yaqīnan ishq se bachnā paḌegā

Leave a Comment