Aaankhon Mein Sitare Se Chamakte Rahe Ta-Der

ā.ankhoñ meñ sitāre se chamakte rahe tā-der

ik ghar ke dar-o-bām ko takte rahe tā-der

aañsū to hue ḳhushk pa girya rahā jaarī

bachchoñ kī tarah ro ke sisakte rahe tā-der

us shāḳh se ik mār-e-siyah lipTā huā thā

lekin vahīñ taa.ir bhī chahakte rahe tā-der

kyā lams thā us dast-e-hinā.ī kā tah-e-āb

añgāre se hāthoñ meñ dahakte rahe tā-der

ik aag sī jaltī rahī tā-umr lahū meñ

ham apne hī ehsās meñ pakte rahe tā-der

vo garmī-e-anfās vo jaaḌe kī ḳhunuk raat

ehsās meñ sho.ale se lapakte rahe tā-der

Leave a Comment