Saleem Ahmed
a.ankhon men sitare se chamakte rahe ta-der
ik ghar ke dar-o-bam ko takte rahe ta-der
aansu to hue ḳhushk pa girya raha jaari
bachchon ki tarah ro ke sisakte rahe ta-der
us shaḳh se ik mar-e-siyah lipTa hua tha
lekin vahin taa.ir bhi chahakte rahe ta-der
kya lams tha us dast-e-hina.i ka tah-e-ab
angare se hathon men dahakte rahe ta-der
ik aag si jalti rahi ta-umr lahu men
ham apne hi ehsas men pakte rahe ta-der
vo garmi-e-anfas vo jaaḌe ki ḳhunuk raat
ehsas men sho.ale se lapakte rahe ta-der
Leave a Reply