naqsh karta ram-o-raftar inan-gir ko main
kaisa chhankata hua chalta huun zanjir ko main
ghaib-o-ghaflat ka idhar jashn mana luun to chalun
abhi taḳhir samajhta nahin taḳhir ko main
ḳhamushi meri kuchh aisi hadaf agah nahin
baat be-bat chala deta huun is tiir ko main
satvan din magar achchha nahin guzra mera
chhe din ulTata raha parda-e-tamir ko main
mauj-e-ḳhun mujh se bas ab shaam ki duuri par hai
kitne din aur bacha sakta huun shamshir ko main
darmiyan mera ilaqa hai bata.un na bata.un
ek tasvir ka dukh dusri tasvir ko main
phir vo satr aati hai jab asal likhi jaati hai
mujh ko tahrir miTa aati hai tahrir ko main
kahan le jaane ko thi paanv ki zanjir mujhe
kahan le aaya magar paanv ki zanjir ko main
nazm ho baiTha huun ahang-daron ke hathon
nazm karta hua ik nala-e-shab-gir ko main
Leave a Reply