vahm sabit hue sab ḳhvab suhane tere
yaad karte hain magar log fasane tere
kaash vo din na kabhi aa.e ki tu aa jaa.e
raas aate hain mire ji ko bahane tere
aisi uftad paḌi apni ḳhabar bhi na rahi
ham to aa.e the yahan rang jamane tere
kal chhupa rakhte the ḳhud se bhi mohabbat apni
aaj aa.e hain tujhe daagh dikhane tere
ḳhalq ka dhyan haTate rahe kanTe kya kya
raaz ifsha kiye sab bad-e-saba ne tere
dard kya kya na mile shauq-e-talab se apne
zaḳhm kya kya na diye zauq-e-haya ne tere
juz tire chahne vaala tha na un ka koi
lauT kar aa.e na ‘shohrat’ vo zamane tere
Leave a Reply