Bashir Badr
udaas raat hai koi to ḳhvab de jaao
mire gilas men thoḌi sharab de jaao
bahut se aur bhi ghar hain ḳhuda ki basti men
faqir kab se khaḌa hai javab de jaao
main zard patton par shabnam saja ke laaya huun
kisi ne mujh se kaha tha hisab de jaao
adab nahin hai ye aḳhbar ke tarashe hain
ga.e zamanon ki koi kitab de jaao
phir us ke ba.ad nazare nazar ko tarsenge
vo ja raha hai ḳhizan ke gulab de jaao
miri nazar men rahe Dubne ka manzar bhi
ghurub hota hua aftab de jaao
hazar safhon ka divan kaun paḌhta hai
‘bashir-badr’ ka koi intiḳhab de jaao
Leave a Reply