takhil ka dar khole hue shaam khadi hai
goya koi tasvir khayalon men jadi hai
har manzar-e-idrak men phir jaan padi hai
ehsas-e-faravan hai ki savan ki jhadi hai
hai vasl ka hangam ki sailab-e-tajalli
tufan-e-tarannum hai ki ulfat ki ghadi hai
tahzib-e-alam kahiye ki irfan-e-gham-e-zat
kahne ko to do lafz hain har baat badi hai
saaya ho shajar ka to kahin baith ke dam len
manzil to bahut duur hai aur dhuup kadi hai
siine pe mire vaqt ka ye kaun giran hai
neze ki ani ya ki kaleje men gadi hai
vo meri hi gum-gashta haqiqat to nahin hai
raste men kai roz se shai koi padi hai
har lahza piroti huun bikhar jaate hain har baar
lamhat-e-gurezan hain ki moti ki ladi hai
ham aur khuda ka bhi ye ehsan uthate
insan hain kuchh aisi hi baat aan padi hai
Leave a Reply