zaban ko band karen ya mujhe asiir karen
mire ḳhayal ko beḌi pinha nahin sakte
ye kaisi bazm hai aur kaise us ke saaqi hain
sharab haath men hai aur pila nahin sakte
ye bekasi bhi ajab bekasi hai duniya men
koi sata.e hamen ham sata nahin sakte
kashish vafa ki unhen khinch laa.i aḳhir-kar
ye tha raqib ko da.ava vo aa nahin sakte
jo tu kahe to shikayat ka zikr kam kar den
magar yaqin tire va.adon pe la nahin sakte
charagh qaum ka raushan hai arsh par dil ke
use hava ke farishte bujha nahin sakte
Leave a Reply