ham apni suraton se mumasil nahin rahe
ek umr aa.ine ke muqabil nahin rahe
majburiyan kuchh aur hi lahaq rahin hamen
dil se tire ḳhilaf to ai dil nahin rahe
ab vaqt ne paḌhaye to paḌhne paḌe tamam
asbaq jo nisab men shamil nahin rahe
be-chehragi ka dukh bhi bahut hai magar ye ranj
ham teri ik nigah ke qabil nahin rahe
umr-e-ravan ke moḌ pe kuchh ḳhvab mere ḳhvab
kho.e ga.e hain aise ki ab mil nahin rahe
apne liye hamen kabhi fursat na mil saki
us ko gila ki ham use hasil nahin rahe
kya raat thi ki shahr ki surat badal ga.i
ham e’tibar-e-sub.h ke qabil nahin rahe
Leave a Reply