Dinesh Kumar
har kaam yuun karo ki hunar bolne lage
mehnat dikhe sabhi ko asar bolne lage
is bevafa se bolna tauhin thi miri
lekin ye mere zaḳhm-e-jigar bolne lage
tahzib chup hai ilm-o-adab aaj sharmsar
dekho pita ke munh pe pisar bolne lage
ankhon se main zaban ka aise bhi kaam luun
jo bhi main kahna chahun nazar bolne lage
sab ham ko but-parast samajhte rahe magar
aise tarashe ham ne hajar bolne lage
dair-o-haram ke naam pe jab shahar baT gaya
donon taraf se tegh-o-tabar bolne lage
main ne ghazal suna.i ‘zafar’ ki zamin men
sab dost mere mujh ko zafar bolne lage
tu hai ‘dinesh’ aur vo hai chaudhvin ka chand
aapas men kab se shams-o-qamar bolne lage
Leave a Reply