palkon pe tairte hue mahshar tamam-shud
ankhen khulin to ḳhvab ke manzar tamam-shud
zinda hai bhuuk aaj bhi ifrit ki tarah
tir-o-tafang-o-lashkar-o-ḳhanjar tamam-shud
logo tum apne zarf se baḌh kar diya karo
is baar zaḳhm bhar ga.e nashtar tamam-shud
tahrir kar raha tha kahani junun ki main
lekin ḳhayal-o-fikr ka mehvar tamam-shud
ḳhud apna aks a.inon men DhunDte hain log
shisha-garon ke shahr men paikar tamam-shud
jab dhuup oḌhe baiThi ho ghurbat qatar men
samjho ḳhudi ka aḳhiri zevar tamam-shud
‘zakir’ rachi-basi koi sazish faza men thi
uḌne se peshtar mera shahpar tamam-shud
Leave a Reply