rut ḳhizan ki hai aur hari hui hai
shaḳh-e-gul tu to bavri hui hai
kya uḌanon ko hausla degi
ai hava tu to ḳhud Dari hui hai
zindagi mil kabhi to fursat se
baat abhi tujh se sarsari hui hai
koi manzar nahin hai ankhon men
ratjagon ki thakan bhari hui hai
qurbaten karvaTen badalti hui
aur ana beach men dhari hui hai
ye jo baiThe hain sar jhuka.e hue
aaj in se khari khari hui hai
ḳhud-kalami hai ye tiri ‘nusrat’
mat abhi soch sha.iri hui hai
Leave a Reply