ye kah ke aag vo dil men laga.e jaate hain
charagh ḳhud nahin jalte jala.e jaate hain
ab is se baḌh ke sitam doston pe kya hoga
vo dushmanon ko gale se laga.e jaate hain
gharibi jurm hai aisa ki dekh kar mujh ko
nigahen pher ke apne para.e jaate hain
kashish charagh ki ye baat kar ga.i raushan
patinge ḳhud nahin aate bula.e jaate hain
tajalliyon ke hijabat hain ḳhayal rahe
ye parde dast-e-nazar se uTha.e jaate hain
hamen mili hai jagah jab se aap ke dil men
jahan hain aap vahan ham bhi paa.e jaate hain
na puchh hal-e-shab-e-gham na puchh ai ‘purnam’
baha.e jaate hain aansu baha.e jaate hain
Leave a Reply