Raushni Ke Silsile KHwabon Mein Dhal Kar Rah Gae

raushnī ke silsile ḳhvāboñ meñ Dhal kar rah ga.e

jitne manzar the sarāboñ meñ badal kar rah ga.e

sho.abde hī sho.abde phir tāliyāñ hī tāliyāñ

ham hī nādāñ the khilaunoñ se bahal kar rah ga.e

dekhte hī dekhte bāzār ḳhālī ho gayā

log apnī hī sadāoñ se dahal kar rah ga.e

vo tamāzat thī ki jañgal bhī dhuāñ dene lage

lahlahāte khet kyā saa.e bhī jal kar rah ga.e

lafz gūñge to na the par baat adhūrī rah ga.ī

tazkire kitne zabānoñ par machal kar rah ga.e

Leave a Comment