Kab Haq-Parast Zahid-E-Jannat-Parast Hai

kab haq-parast zahid-e-jannat-parast hai

huron pe mar raha hai ye shahvat-parast hai

dil saaf ho to chahiye maani-parast ho

aina khaak saaf hai surat-parast hai

durvesh hai vahi jo riyazat men chust ho

tarik nahin faqir bhi rahat-parast hai

juz zulf sujhta nahin ai murgh-e-dil tujhe

khuffash tu nahin hai ki zulmat-parast hai

daulat ki rakh na mar-e-sar-e-ganj se ummid

muuzi vo dega kya ki jo daulat-parast hai

anqa ne gum kiya hai nishan naam ke liye

gum-gashta kaun kahta hai shohrat-parast hai

ye ‘zauq’ mai-parast hai ya hai sanam-parast

kuchh hai bala se lek mohabbat-parast hai

Leave a Comment