yuun to shumar us ka mire bha.iyon men tha
main tha lahu lahu vo tamasha.iyon men tha
chehre se main ne gham ki lakiren miTa to diin
lekin jo karb ruuh ki gahra.iyon men tha
vo hausla ki pher de jo andhiyon ke ruḳh
vo hausla abhi miri paspa.iyon men tha
deta hai roz ik naya ilzam aj-kal
pahle vo shaḳhs bhi mire shaida.iyon men tha
kahte hain ek main na tha badnam shahr men
charcha tire bhi naam ka rusva.iyon men tha
‘irfan’ vo kam-nasib ki tha jan-e-anjuman
yaron ke beach rah ke bhi tanha.iyon men tha
Leave a Reply