Sufi
zindagi guzri miri khushk shajar ki surat
main ne dekhi na kabhi barg-o-samar ki surat
khuub ji bhar ke rulaen jo nazar men un ki
qimti hon mire aansu bhi guhar ki surat
apne chehre se jo zulfon ko hataya us ne
dekh li shaam ne tabinda sahar ki surat
is nae daur ki tahzib se allah bachae
maskh hoti nazar aati hai bashar ki surat
haram-o-dair se matlab na kalisa se gharaz
kaash ye bhi kahin hote tire ghar ki surat
nek aamal bhi auron ke nahin japte hain
aib apne nazar aate hain hunar ki surat
kya koi us pe bhi uftad padi hai ‘atish’
abr barsa hai mire dida-e-tar ki surat
Leave a Reply