ali-sardar-jafri

Mausam-E-Rang Bhi Hai Fasl-E-Khizan Bhi Tari

mausam-e-rang bhi hai fasl-e-khizan bhi taari

dekhna khuun ke dhabbe hain ki hai gul-kari

us se har tarah se tazlil-e-bashar hoti hai

bais-e-fakhr nahin muflisi-o-na-dari

inqilabi ho to hai faqr bhi tauqir-e-hayat

varna hai ajizi-o-be-kasi-o-ayyari

shoala-e-gul ki badha deti hai lau-e-bad-e-bahar

tah-e-shabnam bhi dahak uthti hai ik chingari

lamha lamha hai ki hai qafila-e-manzil-e-nur

sarhad-e-shab men bhi farman-e-sahar hai jaari

tegh-o-khanjar ko ata karte hain lafzon ki niyam

zulm ki karte hain jab ahl-e-sitam tayyari

harf-e-‘sardar’ men poshida hain asrar-e-hayat

sher-e-‘sardar’ men hai sarkashi-o-sar-shari

sher-e-‘sardar’ men hai shoala-e-be-bak ka rang

harf-e-‘sardar’ men haq-goi-o-khush-guftari

More Poems

Leave a Comment