Sufi
javani men nazar ko tabe-e-ahkam hone do
ye uth jaae jidhar us samt qatl-e-am hone do
adaon ko sharik-e-gardish-e-ayyam hone do
javani men kisi ki hashr ka hangam hone do
nazar ke saath ho jaega qaaem daur-e-mai-khana
zara gardish men chashm-e-saqi-e-gulfam hone do
nazar aa jaega duniya ko barq-o-tur ka aalam
dam-e-didar be-khud mujh ko zer-e-bam hone do
na ham dil ko chhupaen aur na tum phero nigahon ko
ham apna kaam hone den tum apna kaam hone do
khuda maalum le jaae kahan zauq-e-talab mujh ko
abhi to be-khudi-e-shauq ka anjam hone do
kami hai marne valon ki na qatil ki zamane men
kisi ki har ada kahti hai qatl-e-am hone do
khuda vaalo na roko mujh ko mere zauq-e-isyan se
mujhe roz-e-qayamat morid-e-ilzam hone do
abhi kuchh gardishen baaqi hain jam-e-zist ki ‘afqar’
abhi kuchh der shaghl-e-bada-e-gulfam hone do
Leave a Reply