dard apna main isi taur jata rahta huun
hasb-e-hal us ko kai sher suna rahta huun
ik hi ja rahne ka hai ghar pa usi ghar men aah
dil ye rahta hai juda aur main juda rahta huun
baat men kis ki sunun aah ki ai murgh-e-chaman
shor men apne hi nalon ke sada rahta huun
baare itna hai asar dard ke afsane men
ek do shakhs ko har roz rula rahta huun
bazm-e-khuban men ye sar go kate rone pe mira
shama-san ashk par ankhon se baha rahta huun
ah-o-nala men agar kuchh bhi asar hai mere
to main us shokh ko ik roz bula rahta huun
husn aur ishq ka kya zikr karun mat puchho
in dinon ziist se bhi apni khafa rahta huun
dil laga jab se mira aah tabhi se ‘jurat’
kitni hi afaten har roz utha rahta huun
Leave a Reply