Poet
sar-kashi ko jab ham ne ham-rikab rakhna hai
TuTne bikharne ka kya hisab rakhna hai
ek ek saa.at men zindagi samoni hai
ek ek jazbe men inqalab rakhna hai
raat ke andheron se jang karne valon ne
sub.h ki hatheli par aftab rakhna hai
ham pe us se vajib hain koshishen baghavat ki
tum ne jis qabile ko kamyab rakhna hai
rakh do ham faqiron ki is kushada jholi men
apni badshahi ka jo azaab rakhna hai
tum to ḳhud zamane men jabr ki alamat ho
tum ne jabr kya zer-e-ehtisab rakhna hai
shahr-e-be-aman ham ne naqd-e-jan luTa kar bhi
tere har dariche par kal ka ḳhvab rakhna hai
Leave a Reply