Saleem Betab
aaj kuchh andesha-e-sarsar nahin
ab koi ham men shikasta-par nahin
samne shishe to hain lakhon magar
aaj apne haath men patthar nahin
phuul zaḳhmon ke khile hain ja-ba-ja
ye to mere shahr ka manzar nahin
jal rahe hain ham to apni aag men
atishin tera hasin paikar nahin
raushni ki bhiik mangun ghair se
itna bhi tarik mera ghar nahin
ho ga.e ‘betab’ ab ham sarfaraz
ab kisi chaukhaT pe apna sar nahin
Leave a Reply