jagti haqiqat tak rasta hai ḳhvabon ka
darmiyan mire un ke fasla hai ḳhvabon ka
ek shab ke TukḌon ke naam muḳhtalif rakhe
jism-o-ruh ka bandhan silsila hai ḳhvabon ka
dekhen is kashakash ka iḳhtitam ho kab tak
jagne ki ḳhvahish hai hausla hai ḳhvabon ka
apni apni ta.abiren DhunDhta hai har chehra
chehra chehra paḌh liije tazkira hai ḳhvabon ka
nashshe ka ye aalam hai sach hi sach lage sab kuchh
zindagi ki sahba hai mai-kada hai ḳhvabon ka
gard-e-rah ki surat saans saans hai ai ‘nur’
mir-e-karvan main huun qafila hai ḳhvabon ka
Leave a Reply