din men aane lage hain ḳhvab mujhe
us ne bheja hai ik gulab mujhe
guftugu sun raha huun ankhon ki
chahiye aap ka javab mujhe
vaqt-e-fursat ka intizar karun
itni fursat kahan janab mujhe
zo.am tha be-hisab chahat hai
us ne samjha diya hisab mujhe
paḌhta rahta huun aap ka chehra
achchhi lagti hai ye kitab mujhe
lijiye aur imtihan mira
aur hona hai kamyab mujhe
koi aisi ḳhata karun ‘raghib’
jis ka milta rahe savab mujhe
Leave a Reply