Gae Dinon Ka Suragh Le Kar Kidhar Se Aaya Kidhar Gaya Wo

gae dinon ka suragh le kar kidhar se aaya kidhar gaya vo

ajiib manus ajnabi tha mujhe to hairan kar gaya vo

bas ek moti si chhab dikha kar bas ek mithi si dhun suna kar

sitara-e-sham ban ke aaya ba-rang-e-khvab-e-sahar gaya vo

khushi ki rut ho ki gham ka mausam nazar use DhunDti hai har dam

vo bu-e-gul tha ki naghma-e-jan mire to dil men utar gaya vo

na ab vo yadon ka chadhta dariya na fursaton ki udaas barkha

yunhi zara si kasak hai dil men jo zakhm gahra tha bhar gaya vo

kuchh ab sambhalne lagi hai jaan bhi badal chala daur-e-asman bhi

jo raat bhari thi tal gai hai jo din kada tha guzar gaya vo

bas ek manzil hai bul-havas ki hazar raste hain ahl-e-dil ke

yahi to hai farq mujh men us men guzar gaya main thahar gaya vo

shikasta-pa raah men khada huun gae dinon ko bula raha huun

jo qafila mera ham-safar tha misal-e-gard-e-safar gaya vo

mira tu khuun ho gaya hai paani sitamgaron ki palak na bhigi

jo naala uttha tha raat dil se na jaane kyuun be-asar gaya vo

vo mai-kade ko jagane vaala vo raat ki niind udane vaala

ye aaj kya us ke ji men aai ki shaam hote hi ghar gaya vo

vo hijr ki raat ka sitara vo ham-nafas ham-sukhan hamara

sada rahe us ka naam pyara suna hai kal raat mar gaya vo

vo jis ke shane pe haath rakh kar safar kiya tu ne manzilon ka

tiri gali se na jaane kyuun aaj sar jhukae guzar gaya vo

vo raat ka be-nava musafir vo tera shair vo tera ‘nasir’

tiri gali tak to ham ne dekha tha phir na jaane kidhar gaya vo

Leave a Comment