Samundaron Mein Sarab Aur KHushkiyon Mein Girdab Dekhta Hai

samundaroñ meñ sarāb aur ḳhushkiyoñ meñ girdāb dekhtā hai

vo jāgte aur raah chalte ajab ajab ḳhvāb dekhtā hai

kabhī to rishtoñ ko ḳhuun ke bhī fareb-e-vahm-o-gumān samjhā

kabhī vo narġhe meñ dushmanoñ ke hujūm-e-ahbāb dekhtā hai

shanāvarī raas aa.e aisī samundaroñ meñ hī ghar banā le

kabhī talāsh-e-guhar meñ apne ta.iiñ vo ġharqāb dekhtā hai

kabhī taqaddus-e-tavāf kā sā kare hai taarī vo jism o jaañ par

saroñ pe girtā huā kabhī lānatoñ kā mīzāb dekhtā hai

Leave a Comment