Siraj Ajmali
samundaron men sarab aur ḳhushkiyon men girdab dekhta hai
vo jagte aur raah chalte ajab ajab ḳhvab dekhta hai
kabhi to rishton ko ḳhuun ke bhi fareb-e-vahm-o-guman samjha
kabhi vo narghe men dushmanon ke hujum-e-ahbab dekhta hai
shanavari raas aa.e aisi samundaron men hi ghar bana le
kabhi talash-e-guhar men apne ta.iin vo gharqab dekhta hai
kabhi taqaddus-e-tavaf ka sa kare hai taari vo jism o jaan par
saron pe girta hua kabhi lanaton ka mizab dekhta hai
Leave a Reply