ab jaam nigahon ke nasha kyuun nahin dete
ab bol mohabbat ke maza kyuun nahin dete
tum khol ke zulfon ko uḌa kyuun nahin dete
tum shaan ghaTaon ki ghaTa kyuun nahin dete
ik ghunT ki ummid samundar se nahin jab
phir aag samundar men laga kyuun nahin dete
hai muntazir-e-hashr bahut der se duniya
ghunghru tire pairon ke sada kyuun nahin dete
ye dhuup rahegi to ye rusva.i karegi
suraj ko gunahgar bujha kyuun nahin dete
tum dusre logon pe na rakkha karo ilzam
har baat men tum meri ḳhata kyuun nahin dete
qatil ka hai kya naam ye sab puchh rahe hain
kya ham bhi hain hamnam bata kyuun nahin dete
tum ko mire andaz-e-vafa se hai shikayat
tum mujh ko vafa kar ke dikha kyuun nahin dete
jo log ‘alim’ apni jagah miir bane hain
ash.ar ko vo tarz-e-ada kyuun nahin dete
Leave a Reply