har ghaḌi barse hai badal mujh men
kaun hai pyaas se pagal mujh men
tum ne ro-dho ke tasalli kar li
phailta hai abhi kajal mujh men
main adhura sa huun us ke andar
aur vo shaḳhs mukammal mujh men
chup ki divaron se sar phoḌe hai
jo ik avaz hai pagal mujh men
main tujhe sahal bahut lagta huun
tu kabhi chaar qadam chal mujh men
muzhda ankhon ko ki phir se phuTi
ik na.e ḳhvab ki konpal mujh men
kaTne hain ka.i ban-bas yahin
ug raha hai jo ye jangal mujh men
aag men jalta huun jab jab ‘at.har’
aur aa jaata hai kuchh bal mujh men
Leave a Reply