aaj vo phuul bana husn-e-dil-ara dekha
sach hua pichhle baras jo bhi kaha tha dekha
dhyan men laa.e tasavvur men basaya dekha
itna hi ajnabi paaya use jitna dekha
kis vasile se bhala arz-e-tamanna karte
ham ne jis vaqt bhi dekha use tanha dekha
kab se ehsas pe ik bojh liye phirte hain
kaash puchho ki bhari bazm men kya kya dekha
shah-rahon ke ghane peḌ kaTe hain jab se
chaunk uTThe hain jahan apna bhi saaya dekha
daf.atan aa gaya phir Dubte suraj ka ḳhayal
shaam ke vaqt jo dariya ka kinara dekha
Leave a Reply