ḳhud-sata.i se na ham baaz ana se aa.e
go tire shahr men ja kar ke bhi pyase aa.e
is javani men bhi ilzam se Darna hairat
kaun chehre pe nahin kiil muhase aa.e
us ne ik ḳhaas tanasub se mohabbat banTi
mere hisse men hamesha hi dilase aa.e
baat ausaf ki hai nam ki nahin hai bhaa.i
log be-ant samundar se bhi pyase aa.e
DhunDhta hai koi mujh jaisa mujhe gird-o-navah
ik sada mere ta.aqub men sada se aa.e
main ba-sad-shauq giraftar-e-rah-e-ishq hua
varna kuchh log yahan apni ḳhata se aa.e
sirf taqlid se hi qais nahin ban sakte
ya.ani is ishq ka karna bhi ata se aa.e
Leave a Reply