Niyaz Husain Lakhwera
koi bata.e ki ye rang-e-dosti kya hai
vo shaḳhs puchh raha hai ki dilbari kya hai
ga.e dinon ke tabassum ki raakh bikhri hai
hava-e-shahr mire dil men DhunDhti kya hai
fasil-e-jism pe taani hai karb ki chadar
ham ahl-e-dard se puchho ki zindagi kya hai
sitam ki lahr chali aa mujhe gale se laga
mire vajud ke angan men sochti kya hai
vo dhaḌkanon ke talatum se ashna hi nahin
use ḳhabar hi nahin hai ki sha.iri kya hai
jo mah-vashon ki jabinon se phuTti hai ‘niyaz’
parakh sako to parakh lo vo raushni kya hai
Leave a Reply