nazar milate nahin muskura.e jaate hain
batao yuun bhi kahin dil mila.e jaate hain
hujum-e-jalva-e-rangin ka mudda.a ma.alum
hamari tab-e-nazar azma.e jaate hain
hijab ho magar aisa bhi kya hijab aḳhir
jhalak dikhate nahin munh chhupa.e jaate hain
hudud-e-kucha-e-janan men aa ga.e shayad
qadam qadam pe qadam Dagmaga.e jaate hain
ye kis ka zikr hai ai ‘taj’ lab pe sham-o-sahar
ye kis ki yaad men aansu baha.e jaate hain
Leave a Reply