Rashid Anwar Rashid
nazar se duur rahe mujh ko azma.e bhi
agar vo vaqt nahin hai to lauT aa.e bhi
hai abshar to ehsas ko kare sairab
vo pyaas hai to miri tishnagi baḌha.e bhi
vo mauj hai to mujhe gharq bhi zarur kare
hai naḳhuda to bhanvar se nikal laa.e bhi
vo ḳhvab hai to kare bas qayam ankhon men
agar hai ḳhauf to ninden miri uḌaa.e bhi
vo mas.ala hai to meri jabin pe raushan ho
vo koi hal hai to dil ko qarar aa.e bhi
nazar-shanas na ho to mujhe bhi taḌpa.e
vo dil-navaz agar hai to maan jaa.e bhi
agar vo aur koi hai to koi baat nahin
hai zindagi to andheron men gunguna.e bhi
Leave a Reply