shaam se ham ta sahar chalte rahe
chuur the thak kar magar chalte rahe
sang ho jaate jo mud kar dekhte
ungliyan kanon men dhar chalte rahe
asman tha aag patthar thi zamin
thi kahan ja-e-mafar chalte rahe
roz Duube roz ubhre ham magar
surat-e-shams o qamar chalte rahe
sang-bari yuun to ham par bhi hui
ham Dhake hathon se sar chalte rahe
dar badar ki ḳhaak thi taqdir men
ham liye kandhon pe ghar chalte rahe
ham bhi hain ‘bilqis’ majruhin men
ham pe bhi tiir o tabar chalte rahe