aaj kuchh kahne ko thi shoḳhi-e-tadbir miri
hans paḌi paas khaḌi thi kahin taqdir miri
TuTte hi se hui dil men kashakash paida
meri taḳhrib men poshida thi ta.amir miri
hurriyat zulmat-e-zindan men janam leti hai
inqilabat ki tariḳh hai zanjir miri
apni janib kabhi dekha hi nahin tha varna
vus.aten donon jahanon ki hain jagir miri
dosti kaisi rah-o-rasm-e-umumi bhi ga.i
pyaar ki baat kahi aap se taqsir miri
main kahan aap kahan diid ki ummid kahan
yaad aa.uun jo kabhi dekhiye tasvir miri
ibrat-amoz hai duniya ka taghayyur ‘jami’
mujh se milti nahin do roz ki tasvir miri
Leave a Reply