karti hai mujhe qatl mire yaar ki raftar
talvar ki talvar hai raftar ki raftar
kaj aisi na thi aage mire yaar ki raftar
sikha hai magar charkh-e-sitam-gar ki raftar
sar girte hain kat kat ke vo rakhta hai jahan paanv
sikhi hai magar yaar ne talvar ki raftar
gardish hai tiri nargis-e-bimar ko din-rat
dekhi nahin aisi kisi bimar ki raftar
talti nahin zulfon ke tasavvur ki tarah se
hai turfa judai ki shab-e-tar ki raftar
laghzish na ho kyuun kar rah-e-din men mujhe zahid
yaad aa gai us kafir-e-mai-khvar ki raftar
zalim tire kuche se qadam uth nahin sakta
kyuun kar na chalun saya-e-divar ki raftar
kya maar ko nisbat tire gesu ke chalan se
hai saya-e-gesu men sanam maar ki raftar
moti evaz-e-naqsh-e-qadam girte hain ‘nasikh’
aisi hai miri kilk-e-guhar-bar ki raftar
Leave a Reply