ab kisi tasvir ki ra.ana.iyan baten karen
main to chup huun ab miri tanha.iyan baten karen
itni divaron men ik divar hi samjha mujhe
aa ke mere saa.e men parchha.iyan baten karen
rokna bhi narava hai Tokna bhi nagavar
kaan tab hote hain jab rusva.iyan baten karen
ḳhud-kalami ka fusun tanha.iyon ki guftugu
is se to behtar hai jab parchha.iyan baten karen
qafile ki to sama.at aur zaban tak luT ga.i
hindison ke dasht men purva.iyan baten karen
ye dar-o-divar ye chhat jo kabhi girti nahin
mere uThne tak yahi pahna.iyan baten karen
Leave a Reply