haath men apne abhi tak ek saghar hi to hai
jis ko sab kahte hain mai-ḳhana vo andar hi to hai
daam men taa.ir ko le jaati hai daane ki talash
phir bhi mazlumi-o-mahrumi muqaddar hi to hai
kaisi kaisi koshishen kar len miyan-e-jang bhi
mard-e-maidan jo bana hai vo sikandar hi to hai
apne ḳhaliq ki ata par naaz hona chahiye
jo hasad rakhte hain un ka haal abtar hi to hai
ḳhaak ke zarre chamakte hain ziya-e-nur se
asman par jo hai vo ḳhurshid-e-ḳhavar hi to hai
chhoḌiye bughz-o-adavat to samajh men aa.e kuchh
jo ‘vasiya’ ho raha hai tujh ko bavar hi to hai
Leave a Reply